أعلن أيمن أشرف، لاعب الأهلي السابق، اعتزاله كرة القدم رسميًا، منهياً بذلك مسيرة كروية بدأت منذ أن كان في السابعة من عمره وحتى سن الخامسة والثلاثين.
وقال أيمن أشرف خلال لقاءه مع الإعلامي إبراهيم فايق في برنامج الكورة مع فايق:” للحفاظ على صورتي أمام جمهور الاهلي، حبيت أنهي مسيرتي من الباب الكبير، قرار صعب عليا جداً ، القلب عاشق للكورة وعاوز يلعب كورة ولكن العقل بيقول لا”.
وتابع:” بقالي 6 شهور بعافر تفكير، وبيجيلي عروض ومش مناسبة لتاريخي واسمي والعروض دي مش هتضيف ليا أي حاجه، واللي جاي مش هيبقي احسن من اللي فات، فقررت القرار الصعب ده من 4 أيام، الكورة هتوحشني، أنا بلعب كورة من وأنا عندي 7 سنين لحد 35 سنة، البداية كانت داخل النادي الأهلي، والمسيرة مشرفة ومبسوط إني عملت اسم مشرف اللي جمهور الأهلي صنعه”.
واختتم:” فخور بتاريخي لكن اصعب حاجة في قراري هو والدي، عاوز اوجه له رسالة ان انا فخور بيه جدا لان لولاه مكنتش هبقى قاعد قدامكو ولما اخدت رأيه في قرار اعتزالي كان في حالة صعبة وبكى، اتصدم من قراري، مكانش عايزني ابطل كورة دلوقتي وقالي قدامك سنتين تلاتة تقدر تلعب، وانا كنت اقدر العب سنتين تلاتة لكن كنت عاوز احافظ على صورتي واسمي، بعد القرار ده خلاص هقفل كارير واخش في كارير جديد وهتعلم واجتهد واشتغل”.
